Festival Ruta večeras je zatvoren izvedbom predstave “Ex”. Na sceni je gostovalo Mestno gledališče ljubljansko, a publika je aplauzima nagradila ekipu.
Tekst je radio Marius von Mayenburg, a režiju potpisuje Maruša Kink.
Uloge su tumačili Mojca Funkl, Jernej Gašperin, Nina Rakovec.
“Ex” je priča o supružnicima koji više ne vide jedno drugo. Danijel i Katarina, oboje visokoobrazovani. On je arhitekta, ona ljekar.
Spolja izgledaju kao uspješan bračni par, ali u stvarnosti njihova veza je potpuno prazna. Oboje su nezadovoljni životom, karijere im nisu blistave kao što bi oni željeli, mala djeca ih iscrpljuju, umorni su i ogorčeni.
Katarina je agresivna i toksična, Danijel se povlači i pribjegava pasivnoj agresivnosti koja ne nanosi manje rane.
Jedne večeri, dok po običaju razmjenjuju uvrede, na vratima se pojavljuje Danijelova bivša ljubavnica Janja. Ona se poslije svađe sa sadašnjim partnerom našla na ulici i u očaju došla kod njih.
Njen dolazak samo doliva ulje na vatru svađe supružnika.
Netrpeljivosti, provokacijama, optužbama i poniženjima nema kraja. Ispostavlja se i da Danijelov odnos sa Janjom nikako nije u potpunosti raščišćen.
